1 Kronieken 18
01n Zetje loater versluig David de Filistijnen. Hai kreeg heur der onder en pakte heur de stad Gat òf mit lougen rondomheer.
02Ook de Moäbieten versluig e. Sunt dij tied was hai boas over heur en mozzen zai hom belasten betoalen.
03Wieder versluig David Hadadezer, keunenk van Soba, bie Hamat, dou dij onderwegens was om de kontrainen langs de Eufraat te bezetten.
04David veroverde doezend gevechtswoagens op hom en nam zeuvendoezend man peervolk en twinnegdoezend man voutvolk gevangen. De gevechtswoagens muik hai mainst onkloar, op honderd span noa luit hai van ale peerden hakzenen deursnieden.
05Dou kwammen de Arameeërs oet Damascus Hadadezer, keunenk van Soba, te hulp, mor David versluig twijentwinnegdoezend man van heur.
06Doarnoa zette David wachtgarnizouns oet op belangrieke ploatsen in t Aramese laand van Damascus. Sunt dij tied was David boas en mozzen de Arameeërs hom belasten betoalen. De HEER hulp David bie aal wat hai dee.
07David aigende zok de golden schilden tou dij van Hadadezer zien garde wazzen, en brochde dij noar Jeruzalem.
08Oet Tibchat en Kun, twij steden dij van Hadadezer wazzen, huil hai n haile bult koper heer. Loater zol Salomo doar de bronzen Zee, de zoelen en kopern schuddels van moaken.
09Toü, dij keunenk van Hamat was, heurde dat David t haile leger van Hadadezer, keunenk van Soba, versloagen haar.
10 Hai stuurde zien zeun Hadoram noar keunenk David tou om hom de kompelmenten over te brengen veur zien overwinnen op Hadadezer; dij haar ja aaltied mit Toü in oorlog west. Hai brochde hom ook alderhande zulvern, golden en kopern geschenken.
11 Ook dizze geschenken druig keunenk David op aan de HEER, net as aal t gold en zulver dat hai al eerder veroverd haar op aander volken, de Edomieten, de Moäbieten, de Ammonieten, de Filistijnen en de Amalekieten.
12 Abisai, n zeun van Seruja, versluig achtiendoezend man van de Edomieten in de Zoltleegte.
13 Hai nam ale wachtposten van Edom in, en sunt dij tied was David boas over de Edomieten. De HEER hulp David bie aal wat hai dee.
14 Zo regaaierde David over hail Israël en hai zörgde veur recht en rechtveerdege regels veur t haile volk.
15 Joäb, n zeun van Seruja, was de hoogste aanvoerder van t leger. Josafat, n zeun van Achilud, was eerste menister.
16 Sadok, n zeun van Achitub, en Abjatar, n zeun van Abimelech, wazzen priesters; Sawsa was schriever aan t hòf.
17 Benaja, n zeun van Jojada, was bevelhebber over de Keretieten en de Peletieten. David zien aigen zeuns haren de hoogste rangen aan t hòf.
|